मेट्रो ३ प्रकल्पमुदत अडीच ते तीन वर्षांनी वाढण्याची शक्यता

 


स्थैर्य, मुंबई, दि.११: जवळपास दहा महिन्यांहून अधिक काळ बांधकामासाठी स्थगिती देण्यात आलेली मेट्रो ३ची आरेमधील कारशेड अखेर कांजुरमार्गला हलवण्यात आली आहे. यासंदर्भात नेमलेल्या समितीने आपला कौल आरे कारशेडच्या बाजूने देऊनही याबाबत फारशा हालचाली होत नव्हत्या. आजवर 'काम बंद'मुळे या प्रकल्पाला प्रतिदिन चार कोटींचा भुर्दंड सहन करावा लागत होता. नव्या निर्णयानुसार, कारशेड कांजुरमार्गला हलवल्यास प्रकल्पखर्चात ४ हजार कोटी रुपयांचा भुर्दंड तर, प्रकल्पमुदतीत अडीच ते तीन वर्षांचा कालावधी वाढण्याची शक्यता जाणकार व्यक्त करत आहेत.कुलाबा-वांद्रे-सीप्झ या मार्गावर मुंबई मेट्रो रेल कॉर्पोरेशनतर्फे (एमएमआरसी) भुयारी मेट्रोचे बांधकाम सुरू आहे. या प्रकल्पातील सीप्झ ते बीकेसी हा पहिला टप्पा डिसेंबर २०२१ पर्यंत, तर दुसरा टप्पा बीकेसी ते कुलाबा जून २०२२ पर्यंत पूर्ण करण्याचे उद्दिष्ट एमएमआरसीने ठेवले आहे. दरम्यान, या प्रकल्पातील भुयारीकरणाचे सुमारे ८३-८५ टक्के काम पूर्ण झाले आहे. तर, ६० टक्के सिव्हिल वर्क पूर्ण झाले आहे. मात्र कारशेडचे काम पूर्ण होण्यास विलंब लागणार असल्याने इतर कामे पूर्ण झाली तरी प्रकल्प रखडण्याची दाट शक्यता आहे. आरेच्या कारशेडसाठी यापूर्वी चारशे कोटी यापूर्वीच खर्च झाले आहेत. तर, आरे आंदोलनानंतर मिळालेल्या स्थगितीमुळे जवळपास १२०० कोटींचा भुर्दंड प्रशासनाच्या माथी बसला आहे. तत्पूर्वी, एमएमआरडीएने कांजुरमार्गच्या १०२ एकर क्षेत्रावर मेट्रो ६ साठी कारशेड बांधण्याचे नियोजन केले आहे. मात्र सद्यस्थितीत या नवीन जागेसाठी डीपीआर किंवा फिजीबिलीटी अहवाल यापैकी काहीही तयार न झाल्याचे कळते आहे. तसेच कारशेडच्या बांधकामासाठी अद्याप निविदाही काढण्यात आलेल्या नाहीत.

मुख्यमंत्र्यांच्या घोषणेनुसार मेट्रो ३ आणि ६ या प्रकल्पांना एकत्रित केले जाणार आहे. त्यामुळे दोन्ही कॉरिडोरचे कारशेड एकाच ठिकाणी असतील. मेट्रो ६ची कारशेड नियोजित आहे. मात्र मेट्रो ३ मार्गावरील रॅक कारशेडपर्यंत आणण्यासाठी व मेट्रो ६ जोडण्यासाठी एमएमआरसीला नवीन मार्ग तयार करावा लागणार आहे. हा मार्ग एमएमआरसी कसा उभारणार याबाबत कुठलीही माहिती अद्याप मिळालेली नाही. मेट्रो ३ हा भूमिगत, तर मेट्रो ६ हा उन्नत मार्ग आहे. त्यामुळे हे गणित कसे साधणार याकडे सर्वांचे लक्ष लागलेले आहे. आश्चर्याची बाब म्हणजे, एमएमआरसी आपले रॅक कारशेडपर्यंत कसे आणणार याविषयी आम्हाला काही कल्पना नाही, अशी प्रतिक्रिया एमएमआरडीएच्या अधिकाऱ्यांनी देखील नाव न सांगण्याच्या अटीवर दिली आहे. त्यामुळे २०२१ मध्ये मुंबईकरांच्या सेवेत दाखल होणे अपेक्षित असलेला हा महत्त्वाकांक्षी प्रकल्प आता अनिश्चित काळासाठी लांबणीवर पडल्याचे स्पष्ट झाले आहे.


Previous Post Next Post
दैनिक स्थैर्यचे नियमित अपडेट्स आपल्याला WhatsApp द्वारे मिळण्यासाठी येथे किल्क करा.
दैनिक स्थैर्य - Daily Sthairya