छत्रपतींच्या वंशजावरील टीका खपवून घेतली जाणार नाही गृहराज्यमंत्री शंभूराज देसाई यांचा प्रकाश आंबेडकरांना इशारा

 

स्थैर्य, सातारा दि ८: छत्रपतींची गादी व छत्रपती शिवरायांचे वंशज यांना संपूर्ण महाराष्ट्रात व देशात मान आहे . प्रकाश आंबेडकर यांनी खासदार उदयनराजे भोसले व छत्रपती संभाजीराजे भोसले यांच्यावर जी आक्षेपार्ह शब्दात टीका केली ती निंदनीय आहे . छत्रपतींच्या वंशजावरील टीका आम्ही खपवून घेतला जाणार नाही अशा शब्दात गृहराज्यमंत्री शंभूराज देसाई यांनी वंचित बहुजन आघाडीचे अध्यक्ष प्रकाश आंबेडकर यांना ठणकावले .

आघाडीचे अध्यक्ष प्रकाश आंबेडकर यांनी खासदार छत्रपती उदयनराजे भोसले आणि संभाजी राजे भोसले यांच्यावर टीका केली. उदयनराजे आणि संभाजी राजे यांचा नामोल्लेख टाळत ”एक राजा तर बिनडोक तर दुसऱ्यांचा आरक्षणापेक्षा इतर गोष्टींवरच भर”, असं आंबेडकर म्हणाले आहेत. त्या घटनेस शंभूराज देसाई यांनी साताऱ्यात उत्तर देताना सडेतोड प्रतिक्रिया दिली . प्रकाश आंबेडकर यांच्या आक्षेपार्ह वक्तव्यानंतर राज्यभर याचे पडसाद उमटायला सुरुवात झाली आहे. प्रकाश आंबडेकर यांच्या वक्तव्यावर आक्षेप नोंदवत राज्याचे गृहराज्यमंत्री शंभूराज देसाई यांनी त्यांच्या वक्तव्याचा परखड समाचार घेतला .

ते पुढे म्हणाले ”छत्रपती घराण्याचे वंशज श्रीमंत छत्रपती उदयनराजे भोसले यांच्या बद्दल प्रकाश आंबेडकर यांनी केलेले वक्तव्य निंदनीय आहे. संपूर्ण राज्यात छत्रपतींच्या गादीला मानणारे लोक आहेत. संपूर्ण महाराष्ट्रातील जनता छत्रपतींच्या घराण्याला त्यांच्या गादीला वंदन करत आली आहे. त्यामुळं सातारच्या गादीचा अवमान खपवला जाणार नाही. त्याच्यावरील टीका कदापि सहन केली जाणार नाही”, असं गृहराज्यमंत्री शंभूराज देसाई यांनी सांगितले.

”दोन्हीही छत्रपतींनी, सातारा आणि कोल्हापूरच्या गादीच्या प्रतिनिधींनी मराठा आरक्षणासंदर्भात आपली भूमिका स्पष्ट केली आहे. असं असताना प्रकाश आंबेडकरांसारख्या मोठ्या माणसाने छत्रपतींच्या वंशजांवर टीका करणं गैर आहे चुकीचं आहे. आम्ही सातारकर म्हणून आणि छत्रपतींना मानणारे मावळे म्हणुन छत्रपतींच्या वंशजांवर केलेली टीका कदापि सहन करणार नसल्याचे” देसाई यांनी ठणकावून सांगितले.